Waziri kabaka awakumbusha waajiriwa kupewa mafunzo

WAZIRI wa Kazi na Ajira, Mhe. Gaudencia Kabaka amewataka waajiri  wa Mashirika binafsi nchini kuwapa wafanyakazi wao mafunzo ya kuwaongezea ujuzi badala ya kuwaacha waendelee kubaki walivyo kwa kuhofia gharama za mafunzo hayo.
Waziri huyo aliyasema hayo alipokuwa mgeni rasmi katika mkutano wa Chama cha Waajiri Nchini, ATE, uliofanyika jijini Dar es Salaam na kudai waajiri wengi kwa sasa wanaajiri watu kutoka nje kwa kuhofia kuwaendeleza waliopo ambao huwa na kiwango kidogo cha elimu kukwepa gharama za kuwaelimisha.
"Inaonekana waajiri hasa wa sekta binafsi hawatoi mafunzo kwa wafanyakazi wao ila wapo tayari kuchukua wafanyakazi waliokwisha pata mafunzo kutoka nje ya mashirika yao kwa kuhofia gharama," alisema.
Alisema kuwa, mafunzo kwa waajiriwa husaidia kuwaongezea ujuzi katika utendaji wao na hivyo kupanua wigo wa kufikia maendeleo yanayootwa na mashirika hayo kuliko kukwepa jukumu hilo kwa kukimbilia waajiriwa wa kigeni.
Waziri alisema kampuni zote duniani huwa na malengo yake kibishara, lakini huweza yasifikiwe kama kampuni au mashirika hayo hayawaongezei ujuzi watendaji wake, na kusisitiza umuhimu wa waajiri kuzingatia hilo.
Aidha alisema serikali ina lengo kwamba ifikapo mwaka 2025 iwe imeboresha elimu na mafunzo katika jamii pamoja na ujenzi wa uchumi imara na wenye ushindani.
Naye Mwenyekiti wa Chama hicho, Cornelius Kariwa aliitaka serikali kupunguza gharama za uendeshaji wa biashara nchini ili kuweza kumudu ushindani wa kibiashara kwa sasa na kuvutia uwekezaji nchini
Alisema kwa sasa mfanyabiashara analipa kiasi cha asilimia sita ya mshahara wake, hali inayosababisha kukua kwa gharama ya juu ya biashara yake ukilinganisha na nchi nyingine.  
Alisema, kauli mbiu ya chama hicho kwa mwaka 2011 ni "Kuwekeza Katika Rasilimali Watu ni Chachu ya Kuongeza Uzalishaji Katika Nchi Yetu'.

Nisha: Wasanii tusiridhike mapema

MSANII anayekuja juu kwenye fani ya filamu nchini, Salma Jabu 'Nisha' amewataka wasanii wenzake kutoridhika na mafanikio ya kutamba nyumbani na badala yake kujibidiisha kujitangaza katika anga la kimataifa.
Nisha aliyeng'ara kwenye filamu kama 'Family Disaster', 'Better Day', 'Kimya' na nyinginezo, alisema kulewa sifa na mafanikio ya nyumbani kwa wasanii wengi nchini kunachangia wengi wao wasitambe kimataifa, kitu kinachopaswa wabadilike sasa.
"Wasanii nchini wanapaswa kubadilika na kujitangaza kimataifa, tusiridhike na mafanikio ya nyumbani kwani ndio yanatufanya tusipige hatua kubwa kimaendeleo kama wenzetu wa nje,' alisema Nisha, aliyejitumbukiza kwenye fani hiyo miaka mitatu iliyopita.
Nisha ambaye yupo mbioni kuibuka na filamu iitwayo 'Simu Sikioni' ya msanii nguli, Deo Shija, alisema hata yeye mwenyewe pamoja na nyota ya neema kuanza kumulikia kwa sasa nchini, hataridhika hadi atakaposimama kimataifa akichuana na wakali wa dunia katika fani hiyo.
"Ndoto zangu ni kutamba kimataifa kwa kuwa sitaridhika na mafanikio ya nyumbani, jambo ambalo kila msanii wa ukweli anatakiwa awe hivyo," alisema Nisha.
Mzanzibar huyo, alisema anaamini kama kila msanii atakuwa na kiu ya kutamba kimataifa  ni wazi Tanzania itajitangaza na kutoa fursa ya Watanzania kutambulika kama ilivyo kwa Wanigeria, Wamarekani na wasanii wengine wanaotamba ulimwenguni.

Dialo ana tatu mpya akitokea Bondeni

MSANII aliyewahi kufanya shughuli zake nchini Afrika Kusini, Zakaria Kazi Mkombozi maarufu kama Dialo, akishirikiana na bendi yake binafsi ameachia nyimbo tatu mpya ikiwa ni maandalizi ya kupakua albamu yao ya kwanza.
Akizungumza na mtandao huu, Dialo, alizitaja nyimbo hizo ambazo zimeanza kusambazwa kwenye vituo vya redio kuwa ni 'Sudan Risen' unaozungumzia hali ya kisiasa nchini Sudan, 'Madoda Mpela' uliombwa Kizulu na 'Let Do It'.
Dialo alisema nyimbo hizo ni kati ya nyimbo zitakazokuwa kwenye albamu yao ijayo ambayo bado hawajaipa jina, ila alisema itakuwa na nyimbo 10 zilizopo kwenye miondoko ya Reggae, Afro Pop na Ragga.
"Baada ya kuwa kimya tangu niliporejea nchini kutoka Afrika Kusini, nilipokuwa nafanya shughuli zangu za muziki, nimefanikiwa kuunda bendi ambayo tumeachia kazi tatu mpya ikiwa ni maandalizi ya kupakua albamu yetu ya kwanza," alisema.
Dialo alisema mbali na kuendesha bendi ya muziki, lakini pia ameanzisha klabu ya vijana kwa ajili ya kuwapa elimu ya stadi za maisha na kujiepusha na matumizi ya dawa za kulevya na kujikinga na ukimwi.
Alisema bendi yake ina jumla ya wasanii sita ambao ni yeye Dialo, Bob Chuwa, Dk Today, Alex, Katanga Junior (mdogo wa aliyekuwa mpiga dramu maarufu nchini, Gabby Katanga, ambaye kwa sasa ni marehemu, Yuzo na Amani.
Dialo, aliyewahi kufungwa kwa muda wa miaka mitatu nchini Afrika Kusini kwa kile alichodai kufanyiwa hila na watu aliokuwa akifanya nao kazi ya muziki nchini humo, alisema beni yao inatarajiwa kutumbuiza mjini Moshi siku ya Juni 17 mwaka huu.
Alisema onyesho hilo litafanyika kwenye ukumbi wa Glacian Sports Bar, ambapo mbali na kutambulisha nyimbo zao, lakini pia watapiga nyimbo za magwiji wengine wa muziki duniani kwa staili ya kukopi.
"Tumeanza kufanya maonyesho na Juni 17 tutakuwa nyumbani Moshi, Kilimanjaro kwenye ukumbi wa Glacian Sports Bar," alisema.

Shilole, Tafu, wana 'Sikitiko la Mahaba'

MSANII wa filamu ambaye pia ni mwanamuziki, Ramadhani Ally 'Tafu' anatarajia kufyatua filamu yake ya kwanza binafsi iitwayo 'Sikitiko la Mahaba' ambaye atamshirikisha mwanadada anayekuja juu katika fani hiyo, Zena Mohammed 'Shilole'.
Akizungumza na mtandao huu, Tafu, aliyewahi kuwa rapa wa bendi ya Extra Bongo, alisema kazi yake hiyo inayohusika na simulizi ya mapenzi, itawashirikisha pia wasanii wengine wakali kama,  Hisani Muya 'Tino', Ndende, Osela na Tiko.
"Baada ya kutumika kwenye filamu za wengine, hatimaye nimeandaa kazi yangu binafsi ambayo inatarajiwa kurekodiwa wiki ijayo ambayo nitawashirikisha  wakali kama Shilole, Tino, Ndende, Osela na wengineo," alisema.
Aliongeza mara baada ya kazi hiyo kukamilika ataingia tena 'chimbo' kwa ajili ya kufyatua kazi nyingine mbili ambazo tayari ameshaziandaa zilizopewa majina ya 'Boniface' na 'Usinue' atakazoandaa kwa ushirikiano na Shilole na Ndende.
Tafu aliyeuza sura katika kazi mbalimbali kama 'Sawaka', 'Pooja', 'My Darling', 'Paparazi', 'Sikio la Kufa', 'Mahabati', 'The Game of Love', 'Betraya' na nyingezo, alisema ana imani kazi hizo tatu zitamweka katika matawi ya juu kutokana na jinsi simulizi zake zilivyo.
Katika hatua nyingine, msanii nyota wa filamu za vichekesho, Tumaini Martin 'Matumaini' anayetamba sokoni kwa sasa na filamu yake binafsi ya 'Nichakachue Nikuchachue' yupo mbioni kufyatua kazi nyingine mpya iitwayo 'Tifutifu' ambayo imesharekodiwa.
Akizungunza na blogs hii,, Matumaini aliyeibuliwa kwenye sanaa na kundi la Kaole Sanaa, alisema katika kazi hiyo mpya ameshirikiana na waigizaji mahiri wa uchekeshaji kama alivyofanya katika kazi yake ya kwanza inayotamba sokoni.